XIV. Mollis inertia cur tantam diffuderit imis oblivionem sensibus, pocula Lethaeos ut si ducentia somnos arente fauce traxerim, candide Maecenas, occidis saepe rogando: deus, deus nam me vetat inceptos, olim promissum carmen, iambos ad umbilicum adducere. non aliter Samio dicunt arsisse Bathyllo Anacreonta Teium, qui persaepe cava testudine flevit amorem non elaboratum ad pedem. ureris ipse miser: quodsi non pulchrior ignis accendit obsessam Ilion, gaude sorte tua: me libertina nec uno contenta Phryne macerat. XV. Nox erat et caelo fulgebat luna sereno inter minora sidera, cum tu, magnorum numen laesura deorum, in verba iurabas mea, artius atque hedera procera adstringitur ilex lentis adhaerens bracchiis, dum pecori lupus et nautis infestus Orion turbaret hibernum mare, intonsosque agitaret Apollinis aura capillos, fore hunc amorem mutuum. o dolitura mea multum virtute Neaera! nam siquid in Flacco viri est, non feret assiduas potiori te dare noctes, et quaeret iratus parem, nec semel offensi cedet constantia formae, si certus intrarit dolor. superbus incedis malo, tibique Pactolus fluat, formaque vincas Nirea, ast ego vicissim risero. XVI. Altera iam teritur bellis civilibus aetas, suis et ipsa Roma viribus ruit. quam neque finitimi valuerunt perdere Marsi, minacis aut Etrusca Porsenae manus, aemula nec virtus Capuae nec Spartacus acer novisque rebus infidelis Allobrox, aec fera caerulea domuit Germania pube parentibusque abominatus Hannibal: impia perdemus devoti sanguinis aetas, ferisque rursus occupabitur solum. barbarus heu cineres insistet victor et urbem eques sonante verberabit ungula, quaeque carent ventis et solibus ossa Quirini, nefas videre! dissipabit insolens. forte, quod expediat, communiter aut melior pars malis carere quaeritis laboribus? nulla sit hac potior sententia: Phocaeorum velut profugit execrata civitas agros atque Lares patrios, habitandaque fana apris reliquit et rapacibus lupis, ire, pedes quocumque ferent, quocumque per undas Notus vocabit aut protervus Africus. sic placet, an melius quis habet suadere? secunda ratem occupare quid moramur alite? 25 sed iuremus in haec: 'simul imis saxa renarint vadis levata, ne redire sit nefas; neu conversa domum pigeat dare lintea, quando Padus Matina laverit cacumina, in mare seu celsus procurrerit Apenninus, 30 novaque monstra iunxerit libidine mirus amor, iuvet ut tigris subsidere cervis, adulteretur et columba miluo, credula nec ravos timeant armenta leones, ametque salsa levis hircus aequora.' 35 haec et quae poterunt reditus abscindere dulcis eamus omnis execrata civitas, aut pars indocili melior grege; mollis et expes inominata perprimat cubilia. vos, quibus est virtus, muliebrem tollite luctum, 40 Etrusca praeter et volate litora. nos manet Oceanus circumvagus: arva, beata petamus arva, divites et insulas, reddit ubi Cererem tellus inarata quotannis, et inputata floret usque vinea, 45 germinat et numquam fallentis termes olivae, suamque pulla ficus ornat arborem, mella cava manant ex ilice, montibus altis levis crepante lympha desilit pede. illic iniussae veniunt ad mulctra capellae, 50 refertque tenta grex amicus ubera; nec vespertinus circumgemit ursus ovile, neque intumescit alta viperis humus. pluraque felices mirabimur, ut neque largis aquosus Eurus arva radat imbribus, 55 pinguia nec siccis urantur semina glaebis, utrumque rege temperante caelitum. non huc Argoo contendit remige pinus, neque impudica Colchis intulit pedem; non huc Sidonii torserunt cornua nautae, laboriosa nec cohors Ulixei; • nulla nocent pecori contagia, nullius astri gregem aestuosa torret impotentia. Iuppiter illa piae secrevit litora genti, ut inquinavit aere tempus aureum; aere, dehinc ferro duravit saecula, quorum piis secunda vate me datur fuga. XVII. Iamiam efficaci do manus scientiae, supplex et oro regna per Proserpinae, per et Dianae non movenda numina, per atque libros carminum valentium refixa caelo devocare sidera, Canidia, parce vocibus tandem sacris citumque retro solve, solve turbinem. movit nepotem Telephus Nereium, in quem superbus ordinarat agmina Mysorum et in quem tela acuta torserat. unxere matres Iliae addictum feris alitibus atque canibus homicidam Hectorem, postquam relictis moenibus rex procidit heu pervicacis ad pedes Achillei. saetosa duris exuere pellibus laboriosi remiges Ulixei volente Circa membra: tunc mens et sonus relapsus atque notus iri voltus honor. dedi satis superque poenarum tibi, amata nautis multum et institoribus. fugit iuventas, et verecundus color reliquit ossa pelle amicta lurida, tuis capillus albus est odoribus; nullum a labore me reclinat otium, urget diem nox et dies noctem, neque est levare tenta spiritu praecordia. ergo negatum vincor ut credam miser, Sabella pectus increpare carmina caputque Marsa dissilire nenia. quid amplius vis? o mare et terra, ardeo, quantum neque atro delibutus Hercules Nessi cruore nec Sicana fervida virens in Aetna flamma: tu, donec cinis iniuriosis aridus ventis ferar, cales venenis officina Colchicis. quae finis aut quod me manet stipendium? effare! iussas cum fide poenas luam, paratus cxpiare, seu poposceris centum iuvencos, sive mendaci lyra voles sonari: 'tu pudica, tu proba perambulabis astra sidus aureum'. infamis Helenae Castor offensus vicem fraterque magni Castoris, victi prece, adempta vati reddidere lumina: et tu (potes nam) solve me dementia, o nec paternis obsoleta sordibus, nec in sepulcris pauperum prudens anus Novendialis dissipare pulveres! tibi hospitale pectus ct purae manus, tuusque venter Pactumeius, et tuo cruore rubros obstetrix pannos lavit, utcumque fortis exilis puerpera. 'quid obseratis auribus fundis preces? non saxa nudis surdiora navitis Neptunus alto tundit hibernus salo. inultus ut tu riseris Cotyttia |