Dixit, et antè tulit gressum, camposque nitentes Desuper ostentat: dehinc summa cacumina linquunt. At pater Anchises penitùs convalle virenti Inclusas animas, superumque ad lumen ituras, Lustrabat studio recolens; omnemque suorum Fortè recensebat numerum, carosque nepotes, Fataque, fortunasque virûm, moresque, manusque. Isque ubi tendentem adversum per gramina vidit Ænean, alacris palmas utrasque tetendit; Effusæque genis lacrymæ, et vox excidit ore: Venisti tandem, tuaque spectata parenti Vicit iter durum pietas! datur ora tueri, Nate, tua, et notas audire et reddere voces ! Sic equidem ducebam animo, rebarque futurum, Tempora dinumerans; nec me mea cura fefellit. Quas ego te terras et quanta per æquora vectum Accipio! quantis jactatum, nate, periclis! Quàm metui ne quid Libyæ tibi regna nocerent! Ille autem : Tua me, genitor, tua tristis imago, Sæpiùs occurrens, hæc limina tendere adegit. Stant sale Tyrrheno classes. Da jungere dextram, Da, genitor; teque amplexu ne subtrahe,nostro. Sic memorans, largo fletu simul ora rigabat. Ter conatus ibi collo dare brachia circùm ; Ter frustrà comprensa manus effugit imago, Par levibus ventis, volucrique simillima somno. Intereà videt Eneas in valle reductâ Seclusum nemus, et virgulta sonantia silvis, Lethæumque, domos placidas qui prænatat, amnem. Hunc circum innumeræ gentes populique volabant : Ac veluti in pratis, ubi apes æstate serena Floribus insidunt variis, et candida circum
Lilia funduntur; strepit omnis murmure campus.
Horrescit visu subito, causasque requirit Inscius Æneas, quæ sint ea flumina porrò, Quive viri tanto complêrint agmine ripas. Tùm pater Anchises: : Animæ, quibus altera fato Corpora debentur, Lethæi ad fluminis undam Securos latices et longa oblivia potant.
Has equidem memorare tibi, atque ostendere coràm, Jampridem hanc prolem cupio enumerare tuorum, Quò magis Italiâ mecum lætere repertâ
O pater, anne aliquas ad cœlum hinc ire putandum est Sublimes animas? iterùmque ad tarda reverti Corpora? Quæ lucis miseris tàm dira cupido? Dicam equidem, nec te suspensum, nate, tenebo: Suscipit Anchises, atque ordine singula pandit. Principio cœlum ac terras, camposque liquentes, Lucentemque globum lunæ, Titaniaque astra, Spiritus intùs alit; totamque infusa per artus Mens agitat molem, et magno se corpore miscet. Indè hominum pecudumque genus, vitæque volantûm, Et quæ marmoreo fert monstra sub æquore pontus. Igneus est ollis vigor et coelestis origo
Seminibus, quantùm non noxia corpora tardant, Terrenique hebetant artus moribundaque membra. Hinc metuunt cupiuntque, dolent gaudentque; neque auras Dispiciunt, clausæ tenebris et carcere cæco.
Quin et supremo cùm lumine vita reliquit, Non tamen omne malum miseris, nec funditùs omues Corporeæ excedunt pestes; penitùsque necesse est Multa diù concreta modis inolescere miris. Ergo exercentur pœnis, veterumque malorum Supplicia expendunt. Aliæ panduntur inanes Suspensæ ad ventos: aliis sub gurgite vasto Infectum eluitur scelus, aut exuritur igni :
Quisque suos patimur Manes; exindè per amplum Mittimur Elysium, et pauci læta arva tenemus; Donec longa dies, perfecto temporis orbe, Concretam exemit labem, purumque reliquit Æthereum sensum, atque auraï simplicis ignem. Has omnes, ubi mille rotam volvêre per annos, Lethæum ad fluvium Deus evocat agmine magno, Scilicet immemores supera ut convexa revisant, Rursus et incipiant in corpora velle reverti.
Dixerat Anchises : natumque, unàque Sibyllam, Conventus trahit in medios turbamque sonantem; Et tumulum capit, undè omnes longo ordine possit Adversos legere, et venientûm discere vultus. Nunc age, Dardaniam prolem quæ deindè sequatur Gloria, qui maneant Italâ de gente nepotes, Illustres animas nostrumque in nomen ituras, Expediam dictis, et te tua fata docebo.
Ille, vides, purâ juvenis qui nititur hastâ, Proxima sorte tenet lucis loca; primus ad auras Æthereas Italo commixtus sanguine surget, Silvius, Albanum nomen, tua postuma proles; Quem tibi longævo serum Lavinia conjux Educet silvis regem, regumque parentem ; Undè genus longâ nostrum dominabitur Albâ.
Proximus ille Procas, Trojanæ gloria gentis; Et Capys, et Numitor; et, qui te nomine reddet, Silvius Æneas, pariter pietate vel armis Egregius, si unquàm regnandam acceperit Albam. Qui juvenes quantas ostentant, aspice, vires! At qui umbrata gerunt civili tempora quercu, Hi tibi Nomentum, et Gabios, urbemque Fidenam ; Hi Collatinas imponent montibus arces,
Pometios, Castrumque Inui, Bolamque, Coramque.
Hæc tùm nomina erunt, nunc sunt sine nomine terræ. Quin et avo comitem sese Mavortius addet Romulus, Assaraci quem sanguinis Ilia mater Educet. Viden' ut geminæ stant vertice crista, Et Pater ipse suo Superûm jam signat honore? En hujus, nate, auspiciis illa inclyta Roma Imperium terris, animos æquabit Olympo, Septemque una sibi muro circumdabit arces, Felix prole virum : qualis Berecynthia mater Invehitur curru Phrygias turrita per urbes, Læta Deûm partu, centum complexa nepotes, Omnes cœlicolas, omnes supera alta tenentes.
Hùc geminas huc flecte acies: hanc aspice gentem, Romanosque tuos. Hic Cæsar, et omnis lüli Progenies, magnum cœli ventura sub axem. Hic vir, hic est, tibi quem promitti sæpiùs audis, Augustus Cæsar, Divi genus; aurea condet Secula qui rursùs Latio, regnata per arva Saturno quondam; super et Garamantas et Indos Proferet imperium; jacet extra sidera tellus, Extra anni solisque vias, ubi cœlifer Atlas Axem humero torquet stellis ardentibus aptum. Hujus in adventum jam nunc et Caspia regna Responsis horrent Divûm, et Mæotica tellus, Et septem gemini turbant trepida ostia Nili. Nec verò Alcides tantùm telluris obivit; Fixerit æripedem cervam licèt, aut Erymanthi Pacârit nemora, et Lernam tremefecerit arcu. Nec, qui pampineis victor juga flectit habenis, Liber, agens celso Nisa de vertice tigres. Et dubitamus adhuc virtutem extendere factis? Aut metus Ausoniâ prohibet consistere terrâ? Quis procul ille autem ramis insignis oliva,
Sacra ferens? nosco crines incanaque menta Regis Romani, primam qui legibus urbem Fundabit, Curibus parvis et paupere terrâ Missus in imperium magnum. Cui deindè subibit, Otia qui rumpet patriæ, residesque movebit Tullus in arma viros, et jam desueta triumphis Agmina. Quem juxta sequitur jactantior Ancus, Nunc quoque jam nimiùm gaudens popularibus auris, Vis et Tarquinios reges, animamque superbam Ultoris Bruti, fascesque videre
Consulis imperium hic primus sævasque secures Accipiet; natosque pater, nova bella moventes, Ad pœnam pulchrâ pro libertate vocabit. Infelix! utcunquè ferent ea facta minores, Vincet amor patriæ, laudumque immensa cupido, Quin Decios, Drusosque procul, sævumque securi Aspice Torquatum, et referentem signa Camillum. Illæ autem, paribus quas fulgere cernis in armis, Concordes animæ nunc, et dùm nocte prementur, Heu! quantum inter se bellum, si lumina vitæ Attigerint, quantas acies stragemque ciebunt! Aggeribus socer Alpinis, atque arce Monœci Descendens, gener adversis instructus Eois. Ne, pueri, ne tanta animis assuescite bella: Neu patriæ validas in viscera vertite vires. Tuque prior, tu parce, genus qui ducis Olympo: Projice tela manu, sanguis meus.
Ille triumphatâ Capitolia ad alta Corintho Victor aget currum, cæsis insignis Achivis. Eruet ille Argos, Agamemnoniasque Mycenas, Ipsumque aciden, genus armipotentis Achillei; Ultus avos Troja, templa et temerata Minervæ. Quis te, magne Cato, tacitum, aut te, Cosse, relinquat?
« ForrigeFortsæt » |